Vishwanathashtakam
Draft — pending review. This text has been sourced and translated per our editorial policy, but has not yet completed human review against sung versions. Wording may change.
verse 1
गङ्गातरंगरमणीयजटाकलापं
Gaṅgātaraṃgaramaṇīyajaṭākalāpaṃ
गौरीनिरन्तरविभूषितवामभागम् ।
Gaurīnirantaravibhūṣitavāmabhāgam |
नारायणप्रियमनंगमदापहारं
Nārāyaṇapriyamanaṃgamadāpahāraṃ
वाराणसीपुरपतिं भज विश्वनाथम्
Vārāṇasīpurapatiṃ bhaja viśvanātham
verse 2
वाचामगोचरमनेकगुणस्वरूपं
Vācāmagocaramanekaguṇasvarūpaṃ
वागीशविष्णुसुरसेवितपादपीठम् ।
Vāgīśaviṣṇusurasevitapādapīṭham |
वामेनविग्रहवरेणकलत्रवन्तं
Vāmenavigrahavareṇakalatravantaṃ
वाराणसीपुरपतिं भज विश्वनाथम्
Vārāṇasīpurapatiṃ bhaja viśvanātham
verse 3
भूताधिपं भुजगभूषणभूषितांगं
Bhūtādhipaṃ bhujagabhūṣaṇabhūṣitāṃgaṃ
व्याघ्राजिनांबरधरं जटिलं त्रिनेत्रम् ।
Vyāghrājināṃbaradharaṃ jaṭilaṃ trinetram |
पाशांकुशाभयवरप्रदशूलपाणिं
Pāśāṃkuśābhayavarapradaśūlapāṇiṃ
वाराणसीपुरपतिं भज विश्वनाथम्
Vārāṇasīpurapatiṃ bhaja viśvanātham
verse 4
शीतांशुशोभितकिरीटविराजमानं
Śītāṃśuśobhitakirīṭavirājamānaṃ
भालेक्षणानलविशोषितपंचबाणम् ।
Bhālekṣaṇānalaviśoṣitapaṃcabāṇam |
नागाधिपारचितभासुरकर्णपूरं
Nāgādhipāracitabhāsurakarṇapūraṃ
वाराणसीपुरपतिं भज विश्वनाथम्
Vārāṇasīpurapatiṃ bhaja viśvanātham
verse 5
पंचाननं दुरितमत्तमतङ्गजानां
Paṃcānanaṃ duritamattamataṅgajānāṃ
नागान्तकं दनुजपुंगवपन्नगानाम् ।
Nāgāntakaṃ danujapuṃgavapannagānām |
दावानलं मरणशोकजराटवीनां
Dāvānalaṃ maraṇaśokajarāṭavīnāṃ
वाराणसीपुरपतिं भज विश्वनाथम्
Vārāṇasīpurapatiṃ bhaja viśvanātham
verse 6
तेजोमयं सगुणनिर्गुणमद्वितीयं
Tejomayaṃ saguṇanirguṇamadvitīyaṃ
आनन्दकन्दमपराजितमप्रमेयम् ।
Ānandakandamaparājitamaprameyam |
नागात्मकं सकलनिष्कलमात्मरूपं
Nāgātmakaṃ sakalaniṣkalamātmarūpaṃ
वाराणसीपुरपतिं भज विश्वनाथम्
Vārāṇasīpurapatiṃ bhaja viśvanātham
verse 7
रागादिदोषरहितं स्वजनानुरागं
Rāgādidoṣarahitaṃ svajanānurāgaṃ
वैराग्यशान्तिनिलयं गिरिजासहायम् ।
Vairāgyaśāntinilayaṃ girijāsahāyam |
माधुर्यधैर्यसुभगं गरलाभिरामं
Mādhuryadhairyasubhagaṃ garalābhirāmaṃ
वाराणसीपुरपतिं भज विश्वनाथम्
Vārāṇasīpurapatiṃ bhaja viśvanātham
verse 8
आशां विहाय परिहृत्य परस्य निन्दां
Āśāṃ vihāya parihṛtya parasya nindāṃ
पापे रतिं च सुनिवार्य मनः समाधौ ।
Pāpe ratiṃ ca sunivārya manaḥ samādhau |
आदाय हृत्कमलमध्यगतं परेशं
Ādāya hṛtkamalamadhyagataṃ pareśaṃ
वाराणसीपुरपतिं भज विश्वनाथम्
Vārāṇasīpurapatiṃ bhaja viśvanātham
phalashruti
वाराणसीपुरपतेः स्तवनं शिवस्य
Vārāṇasīpurapateḥ stavanaṃ śivasya
व्याख्यातमष्टकमिदं पठते मनुष्यः ।
Vyākhyātamaṣṭakamidaṃ paṭhate manuṣyaḥ |
विद्यां श्रियं विपुलसौख्यमनन्तकीर्तिं
Vidyāṃ śriyaṃ vipulasaukhyamanantakīrtiṃ
सम्प्राप्य देहविलये लभते च मोक्षम् ॥
Samprāpya dehavilaye labhate ca mokṣam ||
विश्वनाथाष्टकमिदं यः पठेच्छिवसन्निधौ ।
Viśvanāthāṣṭakamidaṃ yaḥ paṭhecchivasannidhau |
शिवलोकमवाप्नोति शिवेन सह मोदते ॥
Śivalokamavāpnoti śivena saha modate ||
Sourced and cross-checked against two independent sources; our meanings are written in our own words, never copied. Personal, devotional use — including printing and sharing short excerpts with attribution — is free and encouraged.