Subrahmanya Bhujangam
Draft — pending review. This text has been sourced and translated per our editorial policy, but has not yet completed human review against sung versions. Wording may change.
verse 1
सदा बालरूपाऽपि विघ्नाद्रिहन्त्री
Sadā bālarūpā'pi vighnādrihantrī
महादन्तिवक्त्राऽपि पञ्चास्यमान्या ।
Mahādantivaktrā'pi pañcāsyamānyā |
विधीन्द्रादिमृग्या गणेशाभिधा मे
Vidhīndrādimṛgyā gaṇeśābhidhā me
विधत्तां श्रियं काऽपि कल्याणमूर्तिः
Vidhattāṃ śriyaṃ kā'pi kalyāṇamūrtiḥ
verse 2
न जानामि शब्दं न जानामि चार्थं
Na jānāmi śabdaṃ na jānāmi cārthaṃ
न जानामि पद्यं न जानामि गद्यम् ।
Na jānāmi padyaṃ na jānāmi gadyam |
चिदेका षडास्या हृदि द्योतते मे
Cidekā ṣaḍāsyā hṛdi dyotate me
मुखान्निःसरन्ते गिरश्चापि चित्रम्
Mukhānniḥsarante giraścāpi citram
verse 3
मयूराधिरूढं महावाक्यगूढं
Mayūrādhirūḍhaṃ mahāvākyagūḍhaṃ
मनोहारिदेहं महच्चित्तगेहम् ।
Manohāridehaṃ mahaccittageham |
महीदेवदेवं महावेदभावं
Mahīdevadevaṃ mahāvedabhāvaṃ
महादेवबालं भजे लोकपालम्
Mahādevabālaṃ bhaje lokapālam
verse 4
यदा सन्निधानं गता मानवा मे
Yadā sannidhānaṃ gatā mānavā me
भवाम्भोधिपारं गतास्ते तदैव ।
Bhavāmbhodhipāraṃ gatāste tadaiva |
इति व्यञ्जयन्सिन्धुतीरे य आस्ते
Iti vyañjayansindhutīre ya āste
तमीडे पवित्रं पराशक्तिपुत्रम्
Tamīḍe pavitraṃ parāśaktiputram
verse 5
यथाब्धेस्तरङ्गा लयं यान्ति तुङ्गा
Yathābdhestaraṅgā layaṃ yānti tuṅgā
स्तथैवापदः सन्निधौ सेवतां मे ।
Stathaivāpadaḥ sannidhau sevatāṃ me |
इतीवोर्मिपङ्क्तीर्नृणां दर्शयन्तं
Itīvormipaṅktīrnṛṇāṃ darśayantaṃ
सदा भावये हृत्सरोजे गुहं तम्
Sadā bhāvaye hṛtsaroje guhaṃ tam
verse 6
गिरौ मन्निवासे नरा येऽधिरूढा
Girau mannivāse narā ye'dhirūḍhā
स्तदा पर्वते राजते तेऽधिरूढाः ।
Stadā parvate rājate te'dhirūḍhāḥ |
इतीव ब्रुवन्गन्धशैलाधिरूढः
Itīva bruvangandhaśailādhirūḍhaḥ
स देवो मुदे मे सदा षण्मुखोऽस्तु
Sa devo mude me sadā ṣaṇmukho'stu
verse 7
महाम्भोधितीरे महापापचोरे
Mahāmbhodhitīre mahāpāpacore
मुनीन्द्रानुकूले सुगन्धाख्यशैले ।
Munīndrānukūle sugandhākhyaśaile |
गुहायां वसन्तं स्वभासा लसन्तं
Guhāyāṃ vasantaṃ svabhāsā lasantaṃ
जनार्तिं हरन्तं श्रयामो गुहं तम्
Janārtiṃ harantaṃ śrayāmo guhaṃ tam
verse 8
लसत्स्वर्णगेहे नृणां कामदोहे
Lasatsvarṇagehe nṛṇāṃ kāmadohe
सुमस्तोमसञ्छन्नमाणिक्यमञ्चे ।
Sumastomasañchannamāṇikyamañce |
समुद्यत्सहस्रार्कतुल्यप्रकाशं
Samudyatsahasrārkatulyaprakāśaṃ
सदा भावये कार्तिकेयं सुरेशम्
Sadā bhāvaye kārtikeyaṃ sureśam
verse 9
रणद्धंसके मञ्जुलेऽत्यन्तशोणे
Raṇaddhaṃsake mañjule'tyantaśoṇe
मनोहारिलावण्यपीयूषपूर्णे ।
Manohārilāvaṇyapīyūṣapūrṇe |
मनःषट्पदो मे भवक्लेशतप्तः
Manaḥṣaṭpado me bhavakleśataptaḥ
सदा मोदतां स्कन्द ते पादपद्मे
Sadā modatāṃ skanda te pādapadme
verse 10
सुवर्णाभदिव्याम्बरैर्भासमानां
Suvarṇābhadivyāmbarairbhāsamānāṃ
क्वणत्किङ्किणीमेखलाशोभमानाम् ।
Kvaṇatkiṅkiṇīmekhalāśobhamānām |
लसद्धेमपट्टेन विद्योतमानां
Lasaddhemapaṭṭena vidyotamānāṃ
कटिं भावये स्कन्द ते दीप्यमानाम्
Kaṭiṃ bhāvaye skanda te dīpyamānām
verse 11
पुलिन्देशकन्याघनाभोगतुङ्ग
Pulindeśakanyāghanābhogatuṅga
स्तनालिङ्गनासक्तकाश्मीररागम् ।
Stanāliṅganāsaktakāśmīrarāgam |
नमस्याम्यहं तारकारे तवोरः
Namasyāmyahaṃ tārakāre tavoraḥ
स्वभक्तावने सर्वदा सानुरागम्
Svabhaktāvane sarvadā sānurāgam
verse 12
विधौ कॢप्तदण्डान् स्वलीलाधृताण्डा
Vidhau kḷptadaṇḍān svalīlādhṛtāṇḍā
न्निरस्तेभशुण्डान् द्विषत्कालदण्डान् ।
Nnirastebhaśuṇḍān dviṣatkāladaṇḍān |
हतेन्द्रारिषण्डाञ्जगत्त्राणशौण्डान्
Hatendrāriṣaṇḍāñjagattrāṇaśauṇḍān
सदा ते प्रचण्डान् श्रये बाहुदण्डान्
Sadā te pracaṇḍān śraye bāhudaṇḍān
verse 13
सदा शारदाः षण्मृगाङ्का यदि स्युः
Sadā śāradāḥ ṣaṇmṛgāṅkā yadi syuḥ
समुद्यन्त एव स्थिताश्चेत्समन्तात् ।
Samudyanta eva sthitāścetsamantāt |
सदा पूर्णबिम्बाः कलङ्कैश्च हीना
Sadā pūrṇabimbāḥ kalaṅkaiśca hīnā
स्तदा त्वन्मुखानां ब्रुवे स्कन्द साम्यम्
Stadā tvanmukhānāṃ bruve skanda sāmyam
verse 14
स्फुरन्मन्दहासैः सहंसानि चञ्च
Sphuranmandahāsaiḥ sahaṃsāni cañca
त्कटाक्षावलीभृङ्गसङ्घोज्ज्वलानि ।
Tkaṭākṣāvalībhṛṅgasaṅghojjvalāni |
सुधास्यन्दिबिम्बाधराणीशसूनो
Sudhāsyandibimbādharāṇīśasūno
तवालोकये षण्मुखाम्भोरुहाणि
Tavālokaye ṣaṇmukhāmbhoruhāṇi
verse 15
विशालेषु कर्णान्तदीर्घेष्वजस्रं
Viśāleṣu karṇāntadīrgheṣvajasraṃ
दयास्यन्दिषु द्वादशस्वीक्षणेषु ।
Dayāsyandiṣu dvādaśasvīkṣaṇeṣu |
मयीषत्कटाक्षः सकृत्पातितश्चे
Mayīṣatkaṭākṣaḥ sakṛtpātitaśce
द्भवेत्ते दयाशील का नाम हानिः
Dbhavette dayāśīla kā nāma hāniḥ
verse 16
सुताङ्गोद्भवो मेऽसि जीवेति षड्धा
Sutāṅgodbhavo me'si jīveti ṣaḍdhā
जपन्मन्त्रमीशो मुदा जिघ्रते यान् ।
Japanmantramīśo mudā jighrate yān |
जगद्भारभृद्भ्यो जगन्नाथ तेभ्यः
Jagadbhārabhṛdbhyo jagannātha tebhyaḥ
किरीटोज्ज्वलेभ्यो नमो मस्तकेभ्यः
Kirīṭojjvalebhyo namo mastakebhyaḥ
verse 17
स्फुरद्रत्नकेयूरहाराभिराम
Sphuradratnakeyūrahārābhirāma
श्चलत्कुण्डलश्रीलसद्गण्डभागः ।
Ścalatkuṇḍalaśrīlasadgaṇḍabhāgaḥ |
कटौ पीतवासाः करे चारुशक्तिः
Kaṭau pītavāsāḥ kare cāruśaktiḥ
पुरस्तान्ममास्तां पुरारेस्तनूजः
Purastānmamāstāṃ purārestanūjaḥ
verse 18
इहायाहि वत्सेति हस्तान्प्रसार्या
Ihāyāhi vatseti hastānprasāryā
ह्वयत्यादराच्छङ्करे मातुरङ्कात् ।
Hvayatyādarācchaṅkare māturaṅkāt |
समुत्पत्य तातं श्रयन्तं कुमारं
Samutpatya tātaṃ śrayantaṃ kumāraṃ
हराश्लिष्टगात्रं भजे बालमूर्तिम्
Harāśliṣṭagātraṃ bhaje bālamūrtim
verse 19
कुमारेशसूनो गुह स्कन्द सेना
Kumāreśasūno guha skanda senā
पते शक्तिपाणे मयूराधिरूढ ।
Pate śaktipāṇe mayūrādhirūḍha |
पुलिन्दात्मजाकान्त भक्तार्तिहारिन्
Pulindātmajākānta bhaktārtihārin
प्रभो तारकारे सदा रक्ष मां त्वम्
Prabho tārakāre sadā rakṣa māṃ tvam
verse 20
प्रशान्तेन्द्रिये नष्टसंज्ञे विचेष्टे
Praśāntendriye naṣṭasaṃjñe viceṣṭe
कफोद्गारिवक्त्रे भयोत्कम्पिगात्रे ।
Kaphodgārivaktre bhayotkampigātre |
प्रयाणोन्मुखे मय्यनाथे तदानीं
Prayāṇonmukhe mayyanāthe tadānīṃ
द्रुतं मे दयालो भवाग्रे गुह त्वम्
Drutaṃ me dayālo bhavāgre guha tvam
verse 21
कृतान्तस्य दूतेषु चण्डेषु कोपा
Kṛtāntasya dūteṣu caṇḍeṣu kopā
द्दह च्छिन्द्धि भिन्द्धीति मां तर्जयत्सु ।
Ddaha cchinddhi bhinddhīti māṃ tarjayatsu |
मयूरं समारुह्य मा भैरिति त्वं
Mayūraṃ samāruhya mā bhairiti tvaṃ
पुरः शक्तिपाणिर्ममायाहि शीघ्रम्
Puraḥ śaktipāṇirmamāyāhi śīghram
verse 22
प्रणम्यासकृत्पादयोस्ते पतित्वा
Praṇamyāsakṛtpādayoste patitvā
प्रसाद्य प्रभो प्रार्थयेऽनेकवारम् ।
Prasādya prabho prārthaye'nekavāram |
न वक्तुं क्षमोऽहं तदानीं कृपाब्धे
Na vaktuṃ kṣamo'haṃ tadānīṃ kṛpābdhe
न कार्यान्तकाले मनागप्युपेक्षा
Na kāryāntakāle manāgapyupekṣā
verse 23
सहस्राण्डभोक्ता त्वया शूरनामा
Sahasrāṇḍabhoktā tvayā śūranāmā
हतस्तारकः सिंहवक्त्रश्च दैत्यः ।
Hatastārakaḥ siṃhavaktraśca daityaḥ |
ममान्तर्हृदिस्थं मनःक्लेशमेकं
Mamāntarhṛdisthaṃ manaḥkleśamekaṃ
न हंसि प्रभो किं करोमि क्व यामि
Na haṃsi prabho kiṃ karomi kva yāmi
verse 24
अहं सर्वदा दुःखभारावसन्नो
Ahaṃ sarvadā duḥkhabhārāvasanno
भवान्दीनबन्धुस्त्वदन्यं न याचे ।
Bhavāndīnabandhustvadanyaṃ na yāce |
भवद्भक्तिरोधं सदा कॢप्तबाधं
Bhavadbhaktirodhaṃ sadā kḷptabādhaṃ
ममाधिं द्रुतं नाशयोमासुत त्वम्
Mamādhiṃ drutaṃ nāśayomāsuta tvam
verse 25
अपस्मारकुष्ठक्षयार्शः प्रमेह
Apasmārakuṣṭhakṣayārśaḥ prameha
ज्वरोन्मादगुल्मादिरोगा महान्तः ।
Jvaronmādagulmādirogā mahāntaḥ |
पिशाचाश्च सर्वे भवत्पत्रभूतिं
Piśācāśca sarve bhavatpatrabhūtiṃ
विलोक्य क्षणात्तारकारे द्रवन्ते
Vilokya kṣaṇāttārakāre dravante
verse 26
दृशि स्कन्दमूर्तिः श्रुतौ स्कन्दकीर्ति
Dṛśi skandamūrtiḥ śrutau skandakīrti
र्मुखे मे पवित्रं सदा तच्चरित्रम् ।
Rmukhe me pavitraṃ sadā taccaritram |
करे तस्य कृत्यं वपुस्तस्य भृत्यं
Kare tasya kṛtyaṃ vapustasya bhṛtyaṃ
गुहे सन्तु लीना ममाशेषभावाः
Guhe santu līnā mamāśeṣabhāvāḥ
verse 27
मुनीनामुताहो नृणां भक्तिभाजा
Munīnāmutāho nṛṇāṃ bhaktibhājā
मभीष्टप्रदाः सन्ति सर्वत्र देवाः ।
Mabhīṣṭapradāḥ santi sarvatra devāḥ |
नृणामन्त्यजानामपि स्वार्थदाने
Nṛṇāmantyajānāmapi svārthadāne
गुहाद्देवमन्यं न जाने न जाने
Guhāddevamanyaṃ na jāne na jāne
verse 28
कलत्रं सुता बन्धुवर्गः पशुर्वा
Kalatraṃ sutā bandhuvargaḥ paśurvā
नरो वाथ नारि गृहे ये मदीयाः ।
Naro vātha nāri gṛhe ye madīyāḥ |
यजन्तो नमन्तः स्तुवन्तो भवन्तं
Yajanto namantaḥ stuvanto bhavantaṃ
स्मरन्तश्च ते सन्तु सर्वे कुमार
Smarantaśca te santu sarve kumāra
verse 29
मृगाः पक्षिणो दंशका ये च दुष्टा
Mṛgāḥ pakṣiṇo daṃśakā ye ca duṣṭā
स्तथा व्याधयो बाधका ये मदङ्गे ।
Stathā vyādhayo bādhakā ye madaṅge |
भवच्छक्तितीक्ष्णाग्रभिन्नाः सुदूरे
Bhavacchaktitīkṣṇāgrabhinnāḥ sudūre
विनश्यन्तु ते चूर्णितक्रौञ्चशैल
Vinaśyantu te cūrṇitakrauñcaśaila
verse 30
जनित्री पिता च स्वपुत्रापराधं
Janitrī pitā ca svaputrāparādhaṃ
सहेते न किं देवसेनाधिनाथ ।
Sahete na kiṃ devasenādhinātha |
अहं चातिबालो भवान् लोकतातः
Ahaṃ cātibālo bhavān lokatātaḥ
क्षमस्वापराधं समस्तं महेश
Kṣamasvāparādhaṃ samastaṃ maheśa
verse 31
नमः केकिने शक्तये चापि तुभ्यं
Namaḥ kekine śaktaye cāpi tubhyaṃ
नमश्छाग तुभ्यं नमः कुक्कुटाय ।
Namaśchāga tubhyaṃ namaḥ kukkuṭāya |
नमः सिन्धवे सिन्धुदेशाय तुभ्यं
Namaḥ sindhave sindhudeśāya tubhyaṃ
पुनः स्कन्दमूर्ते नमस्ते नमोऽस्तु
Punaḥ skandamūrte namaste namo'stu
verse 32
जयानन्दभूमञ्जयापारधाम
Jayānandabhūmañjayāpāradhāma
ञ्जयामोघकीर्ते जयानन्दमूर्ते ।
Ñjayāmoghakīrte jayānandamūrte |
जयानन्दसिन्धो जयाशेषबन्धो
Jayānandasindho jayāśeṣabandho
जय त्वं सदा मुक्तिदानेशसूनो
Jaya tvaṃ sadā muktidāneśasūno
verse 33
भुजङ्गाख्यवृत्तेन कॢप्तं स्तवं यः
Bhujaṅgākhyavṛttena kḷptaṃ stavaṃ yaḥ
पठेद्भक्तियुक्तो गुहं सम्प्रणम्य ।
Paṭhedbhaktiyukto guhaṃ sampraṇamya |
सुपुत्रान्कलत्रं धनं दीर्घमायु
Suputrānkalatraṃ dhanaṃ dīrghamāyu
र्लभेत्स्कन्दसायुज्यमन्ते नरः सः
Rlabhetskandasāyujyamante naraḥ saḥ
Sourced and cross-checked against two independent sources; our meanings are written in our own words, never copied. Personal, devotional use — including printing and sharing short excerpts with attribution — is free and encouraged.